«ҰЛТТЫҚ МУЗЫКА – ӨШПЕС ҚҰНДЫЛЫҒЫМЫЗ» атты әдеби-сазды кеш

Күні кеше "Көкшетау" және "Бурабай" шаңырақтарының ұйымдастыруымен "Дара тұлға" жобасы аясында «ҰЛТТЫҚ МУЗЫКА – ӨШПЕС ҚҰНДЫЛЫҒЫМЫЗ» атты әдеби-сазды кеш өтті. Кешіміздің мақсаты - ежелден бері атадан балаға мұра болып, сан ғасырлық тарих қойнауынан өтіп, бүгінде жоғалмай, осы күнге жеткен асыл қазынамыз- ұлттық музыка өнерін ары қарай өсіп келе жатқан ұрпаққа мұра етіп жеткізу. Айтулы күнге Көкше жерін әнге бөлеп жүрген өнер ордасы "Біржан сал" атындағы музыкалық колледж директоры Мұхаммедияр Саян Болатұлы мен шәкірттері, әнші-ұстаз ағаларымыз Төлеген Юсупұлы мен Нұрдаулет Абдурайымов сынды қазақ өнерінің жанашырлары қонақ ретінде шақырылды.
Кеш барысында Саян Болатұлы қолына домбыра алып, көмейінен күмбірлете қазақтың рухы биік дәстүрлі әндерін шәкірттерімен бірге кезек-кезегімен шырқата салып, көрерменнің ыстық ықыласына бөленді. Ұлттық музыка мен оның құндылықтарына ұлттық өнердің зерттелуі мен оның ұрпақтар жалғастығын тілге тиек етіп, бүгінгі уақытта дәріптелуі туралы сыр шертті. Дәстүрлі әнші, қазақ музыка өнерін жоғары деңгейде дәріптеуші-ұстаз ағаларымыздың әңгімесі оқушылар қауымын ұйыта білді. Мектеп-лицейіміздің жас әнші, домбырашы, қобызшы, күйші өнерпаздары өз өнерлерін ортаға салып кешіміздің көркін аша түсті. Кездесу барысында оқушылар қонақтарға көкейде жүрген сұрақтарын қойып, мазмұнды жауап алды. Кеш соңында мектеп-лицей директоры Балташева Айнагул Қыдырбайқызы көпшілікке берері мол, тағылымды іс-шара болғанын атап өтіп, оқушыларға, қонақтарға алғысын білдірді.